Bi zrugg...

...und wett allne "Danke" säge! Ich han vo jenschte Lüt E-Mails, SMS, Telefon und Bsüech becho! Ich bin bechocht, umechauffiert und verwöhnt worde. So vil Interässe, Verständnis und Unterstützig cha mer nome vo ganz speziell guete Lüt becho! Merci vil mol!

Wunder dieser Welt

Nach dem wunderschöne Ottawa simmer is riiisige Toronto ine gfahre. Irgendwie en witzigi Situation will natürli gnau denn wo mir acho sind es riisigs Fäscht in vollem Gang gsi und alles rächt chaotisch worde isch. Am Tag druf simmer witer südöschtlich go d'Niagära Fäll aluege. Bin trotz de Tourischteflueg positiv überrascht gsi. Sie sind würkli iidrücklich! Für all wo über mini mittleri bis hochgradigi Höhenangscht bscheidwüssid: Jo ich bin uf em CN Tower dobe gsi und d'Glasplatte... hed ähm... vil z'vill Lüt gha...

Kilometer um Kilometer

Nach ehre lange Fahrt vo Montréal ufe rund um di gaspischi Halbinsle und zrugg nach Québec simmer in Ottawa acho. Nach em sterile Canberra han ech ned z'vill vo de kanadische Hauptstadt erwarted, bin aber positiv überrascht worde!
Bis jetzt hämer also scho fasch 3200km zruggleid (im europäische Standart wär das öppe vo Lissabon nach Wien)!
Alles Gueti zu oisem Nationalfiirtig übrigens!

Montréal.... encore une fois

Nach vier Flüg (Wagga- Sydney- SanFrancisco- Vancouver- Montréal) und mit mittel mässigem Schlofmango bini also uf em Afang vom Ändi vo minere laaaange Ferie.
Montréal hed sich natürlich völlig verändered und dank echli höchere Temperature mues ich au nüme ganz so vil Ziit unterirdisch verbringe.
Mit mim Väterchen zäme erkunde ich jetzt d'Ostküschte,. Dank dem zämeträffe hed sich min Läbens- standard natürli erheblich verbessered...

Letzte Tage in Australien

D'Ziiiit verflügt! Bin hi und her grisse zwüsche Abschied neh und witerreise, zwüsche Widergseh und verloh. Mini zwe Mönet Australie sind gli ume. Wunderbari Ziit, wie eigentli alles wo mer bisher begägnet isch. Ich han kei Minute bereut das ich de Flug und di einti oder anderi Strapaze uf mich gno han! Bin aber natürli betrüebt de Ed z'verloh (scho wider...)
Wie au immer, uf mich warted drü Wuche Ostküsche Kanada!!! Français anstatt English und Couchetard anstatt Seven Eleven!

Zwei Städte in 72 Stunden

Während de Ed en Motor- transplantation a sim Auto duregfüehrt hed, mit mässigem Erfolg bis jetzt, bin ich go zwe australischi Stadt go erkundige... Melbourne und Canberra!
Melbourne isch mer gad as Herz gwachse, eini vo de interessantischte Städt wo ich scho je gsi bin, jede Egge hed en andere Charm gha, überall heds irgendwelchi Kunschtwerk gha! Bi umenand gloffe bis mer fasch d'Füess abgheid sind!

Canberra hingäge isch mer chli steril vorcho, d'Stadt isch vo A bis Z dureplaned und drum hed si uf mich echli wenig Charakter gha... Deför han ich vill über di australischi Gschicht, d'Aborigenes und d'Politik glernt. Und, fasch am wichtigschte ich han glernt wie mer am bequemschte imene Greyhound Bus schloft!!!!

Trip nach Ulladalla

Ich han vo mim aschträngende Läbensstil mol chli en Pause brucht und bin mit em Ed vo Wagga Wagga, wo mer wohnid, für en Wuche nach Ulladalla am Meer gfahre. Mer händ imene Campervan vo eme Kolleg vo ihm übernachted. Mues es niidlos zuegeh, die australische Stränd sind würkli di schönschte wo ich scho je gseh han!!! Wiise Sand und völlig durchsichtigs Wasser!

Kaenguruhs

Ooops, scho wider es paar Wuche verstriche und ihr haend nued vo mer ghoert... Ich han euch eigentli welle mit Kaenguruh Filmli, Operahouse Foeteli und viiiil Sunne verwoehne aber leider isch es ned ganz eso eifach es Internet Kafi mit Wireless Internet z'finde... Jetzt muend ehr halt mit mine Erzaehlige vorlieb ned.
Bin nach zwe Taeg Sydney in Wagga Wagga und wohne mit em Ed, sim Brueder und eme Arbetskolleg zaeme. Werde also vo allne Siite verwoehnt. Es isch waermer als ich erwarted han, waehrend em Tag isch es T-Shirt-warm nur i de Nacht wirds richtig chalt. und wenns mol zwe Stund raegnet finded all es hegi de ganz Tag graegned. Bin s'Radioteleskop in Parkes go aluege und en riiiiesige Zoo in Dubbo (eigentli Dubbo Dubbo). Witeri Plan sind Canberra, Melbourne und Newcastle. Ich hoffe ich han bis denn zuegriff uf es bessers und guenschtigers Internet.

Schlafmanko

Ich sitze gad zwüsche all mine elektrische Grät wo am Uflade sind, eis Bei uf em Bett voller dräckige Wösch und s'andere balancierend zwüsche zwe Gepäckstück. Verabschidet han ich mich, wie mer uf de Bilder unschwär chan erkänne,
gebührend. Nume gschlofe hani scho lang nüme. Aber mol ehrlich, ich dänke das chan ich de guet im Flüger nohole, oder? De nöchschti Blog iitrag isch de vo de Südsiite vo dere Wält und wird ned über Bäre aber vilich über Känguruh handle :-). Bis gli!

Planänderung

Das isch di ganz "House- keeping WG" vo links nach rächts: Ivan vo Mexiko, ich, Naomi vo Japan, David vo Spanie, Diogo und Aloisiu vo Brasilie.
Flügt für oich d'Ziit eigentli au so schnell verbi wie für mich? Chönd ehr oich vorstelle das ich scho über es halbs Johr weg bi? Für mich isch z'Whistler Routine ikehrt und drum isch es Ziit für öpis nois:
Ich han mich vor guet drü Wuche für en chlini Änderig vo mine Reiseplän entschide. I knapp ehre Wuche wird ich Kanada für zwe Mönet verloh...ich flüg am 15. Mai uf Australie... und jo ich gang natürli de Ed go bsueche!

Bären

Do mäld ich mich doch wideremol... Han hüt am Morge, uf em Wäg zum Skifahre, min erschte Whistler Bär gseh, die sind jetzt also all am verwache. Drum gids do au rächt strengi Bär Regle. Kei Abfall vorem Huus, di öffentliche Abfäll sind all Bäregsichered, choche isch
nume bi gschlossnem Fänschter erlaubt. Und süsch gib ich do obe natürli chli Gas, näbe Skifahre hani jetzt agfange Boxe. Und selbschtverständlich gnüss ich au s'nachtläbe do obe. Letscht Wuche isch "Telus Skifestival" gsi. Mit gratis Konzert und Party Party Party.
Und als öbs mer ned sowieso scho vil z'guet wür go han ich no Bsuech vom Evi und vom Dave becho wo sich mit ihrem goldbrune Auto dur Schneestörm und Schlaglöcher kämpft händ... Ihr sind mini Helde, ich wünsche euch en gueti Heireis und danke vil mol für de Bsuech!

Schwyzerbsuech

Am Zischtig han ich do obe Bsuech gha, de Strebi und d'Lydia sind mini erschte Bsuecher gsi. Ich hoffe sehr es hed neh gfalle do obe. Für mich isch es es sehr es schöns Erlebnis gsi mich wider mol uf Schwyzerdütsch z'underhalte. Vorallem mit Lüüt wo Kanada no ned so guet kännid. Isch rächt iidrücklich wie schnell alles Alltag wird... die kanadischi Fründlich- keit zum Bispil, für mich isch es scho richtig logisch das ich de Busfahrer froge wie's ehm god und mit de Frau wo mer de Kafi macht en chline Schwatz han. Nimmt mich jetzt scho wunder wie mini nöchschte Bsuecher (s'Evi und de Dave am nöchschte Sunntig und d'Marlen mit ihre ganze Crew i ca zwe Wuche) das erlebid.
Aber a all wo Kanada als Reiseziel so chli vorschwebt; ned zögere, es isch de Hammer do!

Whistler Winter

Mer chönt jo eigentli meine ich heg langsam gnueg Winter aber nei... ich bin wieder voll im Januar. Do unde im "Tal" heds also mind 15cm Schnee und er schmiltzt nur langsam. Deför sind d'Bäre langsam am ufwache was min Ufenthalt natürli no vil spannender macht! Han aber do in Whistler no keine gseh (bi mer au ned so sicher öb ich eine wett gseh wenn ich ned dur a Glasschiebe gschützt bin). Wohne duen ich mit 6, mängisch au 7 anderne i mene Huus (zimlich International: Schwede, Dänemark, Japan, Mexiko, Brasilie und Kanada). Es isch echli überfüllt aber je meh ich die Lüt kännelerne desto besser gfallts mer au. Und d'Arbet... ich weiss das das jetzt bim einte oder anderne es schmunzle hervorrüeft und ich verstoh das jo au. Aber ich bin die wo all de Dräck ufputzt wenn d'Lüt s'Hotel verlöhnd...

Bye Bye Vancouver

This time in English. Just to thank all the people I've met here, guys you are amazing. I really enjoyed my time in Vancouver and I expect some visitors in Whistler ;-) Special thanks to: Corean (for having this name), the CAE class (whilst generally agreeing with all of you I must admit that we would have had more fun if we attended all a bit more frequently... but that's just the downside :-D), David and Pia (miss your battles), Mathieu and Wasabi, the homeless guy on Granville Skytrainstation who opened the door so many times for me, Nathalie, Nathalie, Nathalie and Nathalie, Robyn for the double chin pictures no one ever will see, my homestay for the 80 sandwiches, SameSun Pub for having us eaten Nachos every time, the Waterfront gym for letting us play Volleyball on Thuesday, Helene for the correct spelling of "ménage à trois" during the lesson, the twins... do you have any idea how long it took me before I knew who is who? The policeman on the US border for letting me in... and out, the policeman on the Canadian border for letting me in, Fabio for making comments on my Blog, Ida for being Ida, Leo (the dictionary), Evi for being there for me as if I never had left the cute country, Bruno with one girlfriend for every continent,
the duck which ate too much bread, Steve for acting Minny Mouse, the good looking guys in the gym, the guy who has Peach Mentos in his store and the other one who speaks french with me, CN Backpackers for letting me stay and use the hairstraightener, Facebook for all the stupid requests and the English guy who bought me, Chocolate for being so sweet, Tati for selling bags in IH, "Friends" for spicing the Upper Inter- mediate class up. IH for the living room and the worst coffee all over the world, the coffee place two blocs away for being so friendly, Cuppa Joes for the best cones in town, Lugz for the best wireless internet connection, amazing tea and lifemusic on Friday night and last but not least... Ed for driving 5000km and enjoying it, feeding ducks until they get sick, finding pennies, rambling, staring at people and making jokes about them, giving me your whole music library, not telling your car that it was going to be sold until the very last moment, improving my relationship to Sushi, downloading Commander Keen and some other things. Thank you, Danke, Merci, Grazie, Gracias, Danku, Arigato, Doh Je, Obrigado/Obrigada, Xie Xie, Spasibo, Dhanyawaada, Takk

Halbzeit

Ned immer ganz eifach d'Lüt wo mer do ähne känneglernt hed go z'loh. Am Mittwoch isch de Ed zrugg uf Australie und hüt gönd einigi Lüüt vo de Schuel. Do bin ich doch froh, dass es für mich au gli en Wächsel gid. Am Samschtig inere Wuche gang ich uf Whistler is "Four Season Resort Whistler" go schaffe. Bin wahrschinli hauptsächlich Putzfrau. Wenigschtens heisst das mol zur abwächslig meh Gäld ineh als uusgeh...

Vancouver gfallt mer meh und meh aber nach vier Mönet bini glich froh öpis nois z'gseh. Wohne duen ich de imene Staffhouse also mit jenschte Lüüt vo de ganze Wält wo dete schaffe wänd. Ah und en gratis Skipass für de Rescht vo de Saison isch au no de bi... Jetzt sind ihr niidisch, oder?! Frohi Oschtere und allne Reisende (Ed, Pia und Marco) en gueti Reis nach Wagga Wagga, Toronto und die chli Farm wo ich de Name vergässe han irgendwo nördlich vo Vancouver.

Überlebt

Han nach dene Prüefige gad emol zwe Täg frei brucht... Falls ehr oich jetzt frogid wie's gange isch, na ja ich säge do äne allne "I was average" (-mittelmässig). Wie au immer mer händ natürli echli müesse goge fiire ond do isch s'ergäbnis, jo ich weiss, d'Qualität isch ned super. Aber es gid de richtig Iidruck.

Im Land der unbegrenzten Möglichkeiten

Wow, klein Sibylle in den USA, wär hätti das dänkt. De Ed und ich händ am Samschtig sis Auto gno und sind schwupps di bubbs über d'Gränze ghüpft. Vilich ned gad ghüpft, di amerikanische Gränzwächter sind jo ned gad Fäschtkanone... am Ändi vo dem nette Interview frogt mich de Cop: "Why are you so tense?" (tense heisst agspannt). Ich han den nur gmurmled dass mir ned gwöhnt sigi Gränzene so z'überquere. Mini Iidrück vo 48h Amerika... alles isch grösser. Ässe isch stressig will alli so um Chunde kämpfid, d'Kanadier sind definitiv fründlicher. Während de Ed sis Auto verchauft hed han ich brav büffled, jo ehr döfid natürli ned vergässe, dass das mini Wuche isch, am Mittwoch am 3.15pm (also 23.15 MEZ) hani mini mündlichi Prüefig... Dänkid doch bitte a mich, bi nämli es bitzli nervös! Am Samschtig hani de de ganzi Tag schriftlichi Prüefige, also vom 8ti am Morge (17.00 MEZ) bis am 5i (2.00 MEZ).

Wasabi

Nur ganz en churze Iitrag mit Warnig, bevor ich id USA verdufte... Sushi isch hervorragend, aber Wasabi isch mit Vorsicht z'gnüsse. Im Ahang es netts Video vom Matthew vo Genf wo en Löffel voll Wasabi isst. Mini 5$ hed er abglehnt obwohls offesichtlich verdient gsi währed (@Adi, jo das isch wie ich mis Gäld usgibe ;-) ) Vil Spass... AnhangWasabi

Zeitungsauswahl Vancouver

Explosion in Vancouver

Mer händ do am letschte Mittwoch en Explosion i de Stross vo oisere Schuel gha... En unbekannte hed es mexikanisches Restaurant, vomene indische Pärli gführt worde isch id Luft loh goh. Isch zum Glück am morge am 2.30 gsi, nume es paar Stund spöter wär alles voll Lüt gsi.


Das isch d'Uusicht vo de Bar vomene rächt edle Hotel.... Es verstohd sich, dass de Kafi det foif Dollar isch- ned das ich Kafi trunke het!

May Contain Peanuts

WARNIG: Erdnuss M&M's chönnted Spure vo Erdnüss enthalte... Ich weiss ned öb mer uf de andere Siite vo oisem Planet au scho Erdnusswarnige uf Erdnuss M&M's schribed. Cha mer würkli en Firma wo Erdnuss Süessigkeite herstellt vor Gricht stelle will mer allergisch gäge Erdnüss isch und ned gnueg gwarnt worde isch? Stohd uf Milch "Contains Lactose"?




Und de isch de Winter doch mol no zu ois ad Westküschte cho. Mit unerwartete Uswürklige: mindischtens d'Hälfti vo allne Schüeler und Lehrer isch über en halb Stund z'spot id Schuel cho! Ganz offe- do im "warme" Vancouver chönds ned autofahre wenns wiis isch uf de Stross ;-)

Änglisch büffle

Es gid also au schöns Wätter do, di letschte zwe Täg sind wunderschön gsi!!! Fasch au scho chli warm!!!! Das Bild isch gad hüt im Stanley Park entschtande.

Süsch isch eigentli alles bim alte. Vor zwe Wuche hed jo de "Advanced" Vorbereitigskurs agfange. Das heisst ich han chli müesse de Finger us em Füdli neh, jo ich muen lerne, Ufzgi mache und all das Züüg wo mer scho lang wider vergässe händ wies god ;-)

Räge, Räge, Räge

Damit die wunderschöne Rägewälder um Vancouver au gnueg Wasser händ schint do gad d'Rägeziit usbroche z'si, kein Tag ohni Räge!!! Aber he, geschter hani mol d'Sunne gseh, so für en halb Stund, si existiert also no :-) Aber wo's chalt und ungmüetlich isch isch es meischtens umso gmüetlicher i de Rümlichkeite. D'Schuel gid sich mit diverse Aktivitäte alli Müeh zum ois bi Luune bhalte, so isch jede Donnschtig "Pub- oder Clubnight" mit gratis Iitritt und Drink das ganze bi Lifemusig!!! Und geschter Nomitag hämer Billard/Bowling Nomitag gha. Es isch scho fasch lächerlich wie schlächt ich bin!!! Geschter isch denn de Abschied vom Bruno gsi (das isch de wo oich am 3.1.08 erchlärt hed was es mit sim Dütsch uf sich hed). Bi chli trurig worde er isch en guete Kolleg gsi do. Tja öper god und öper chund.

Während de Bruno hoch über den Wolken richtig Oste flügt kämpft sich de Ed (de Australier vo Montréal) gad dur d'Strosse vo de nördliche Staate vo Amerika zum mich in Vancouver goge bsueche, ich freu mich riesig ihn widerzgseh!!!!

Herzlich Willkommen im 2008

Wie unschwer z'erkänne bin ich wie versproche a dere Studiparty glandet und es isch zimli luschtig gsi... D'Brasilianer händ ois Lektione für Salsa, Samba und was au immer geh... Ned all händ sehr guet drin abgschlosse... Vilich isch es oich ufgfalle vil uf de Föteli trägid wiis, das isch a dem Obig sehr wohl überleid... In Brasilie treid mer bi Johreswächsel wiss für Friede. Meischtens kombiniert mit Gälb (oder Gold) für Gäld und Rot für Liebi. Ich han under mim wiise Jäggli es gälbs T-Shirt agha, ich hoffe es nützt!

Das isch de Bruno, vo Brasile, ond er hed en sehr en wichtigi Botschaft a oich alli, losed guet zue, mer gods mängisch ähnlich wie ihm!