Guete Rutsch

Do ich weiss wie s'Netz normalerwiis am 31.12 am Obig funktioniert... han ich mich churzfrischtig deför entschiede oich uf dem Wäg en guete Rutsch z'wünsche!!! Ich danke oich allne für d'Unterstützig im letschte Johr... ich weiss ich bin ned immer die eifachscht... aber he- bi doch glich irgendwie liebenswürdig oder?! :-) Danke für alles!!! Rutschid guet is 2008, chömid mich mol go bsueche... mindischtens uf de Homepage.
Ah... was ich hüt mache? Wahrschinli gang ich zersch anen Party vomene Kolleg und denn id Stadt! Bis im nöchschte Johr!

Kanadische Weihnachten

Ich hoffe ihr händ d'Wiehnachtstäg guet überstande?! Ich han drü supergueti Täg uf em Land verbrocht:
24.12: D'Robyn, ihre Vater(Mike) und ich sind zum Manning Park gfahre, ihri Brüedere (Tim und Chris) sind dete am Snowboarde gsi. Ich han döfe Schneetöff und Pischtefahrzüüg mitfahre (zimli cool und steil gsi!). Am Obig sind all zäme mit ihrne Ski u/o Snowboard und rote Fackle is Tal gfahre, Füührwerch azündet und händ ois (Touris) "Merry Christmas" zuegrüeft.
25.12: Nach ehme gmüetliche Bad im freie hämmer Gschänkli uspackt. Denn heds es riichhaltigs z'Morgeässe geh. De Rescht vo de Robyn ihrere Familie isch denn no uf Bsuech cho inkl. Hund. Natürlich heds en Truthan geh zum ässe. Das arme Tier hed 12h im Bachofe verbrocht bevor mer's verzehrt händ. Hüt bin ich zrugg uf Vancouver gfahre worde, will morn muess ich wider id Schuel!
Do gsähnd ihr no di ganzi Fäscht- gsellschaft! Witer unde han ich euch no es Video dezue to... die schön kanadischi Landschaft am Tag vom Heilige Obig und en spezielle Schneema vorem Huus wo d'Robyn ufgwachse isch! Vil vergnüege.

Merry Christmas

Ich bin mich gad am parat mache für de Wäg uf Hope- das isch dete wo
d'Robyn wohnt. Ich bin iiglade d'Fäschttäg mit ihre z'verbringe! Ich wird mich di nöchschte Täg also ned gross um min Blog kümere...
Ich wünsch oich allne ganz frohi Wiehnachte, trinked ned zvill, oder de halt doch, wenn ehr's ned chönd loh! Gnüssed oichi Familie, mini fehlt mer jetzt natürli es bitzli!

WG mit Food- und Cleanservice

Nach einehalb Wuche Vancouver isch es wohl wieder emol Ziit mich, zmälde... Ich hoffe jo, ihr sind inzwüsche im Gschänklistress (ebe... d'Adrässe am Ändi vom Blog :-) ) Ich han chli es schiters Wuchenänd gha, das heisst de Fritig isch cool gsi, mer (es paar vo de Schuel)sind nach ehre X-mas Party (mit absolut kitschigem Wiehnachtsbaum) is Roxy gange. S'Roxy isch eine vo de ältischte Disco's in Vancouver, mit Lifemusig und so!!! Am Samschtig hämmer i de Gaschtfamilie, das isch eigentli meh en WG mit Food- und Cleanservice, en DVD Obig gmacht. I de Nacht vom Samschtig uf de Sunntig sind mini japanisch Mitstudäntin und ich abwächselnd ufs WC grännt und händ de ganz Sunntig brav im Bett verbrocht. Hert wie ich bin hed mer mich am Mäntig wider chönne i de Schuel aträffe.
Ehr gsänd do gad die wichtigschte Lüüt für mich i de Schuel. Im erschte Bild gsänd ehr d'Brasilianer (Carol, Tati, Cäsar, Dani) und im zwoite die aktuell CH-Cambridge Klass... (d'Corinne und JA mich).

Vancouver Cookies

Vo über vierzg Centi Schnee in Montréal in Räge vo Vancouver... da hed mi scho gad echli möge... Aber Vancouver isch mer schnell es zwoits mol as Herz gwachse. Das do isch d'Ussicht vom Schuel- zimmer... Jo, mer gseht de Pazifik! Und nei... ich luege nie us em Fänschter :-).
Und de hani d'Robyn wider gseh, das isch mini kanadischi Kollegin. Zäme simmer in Stanley Park (de gröschti Park vo Vancouver) go d'Wiehnachtsliechter luege. Chli kitschig natürli, aber mit vil Liebi vorallem für d'Chind gmacht. Drum sind au es Paar Cookies umeghüpft.

No churz öpis zu de Schuel, im Momänt bin ich im Hospitality Kurs, det gods vorallem um kanadischi Bewerbige, Bewerbigs- gspröch, Chundeservice und Umgang mit "schwierige Chunde". I de dritte oder vierte Wuche mach ich denn es Zertifikat dass ich döf in Kanada Alkohol uusschänke- Läbensschuel also!!!

Au Revoir Montréal

He, bi jetzt also in Vancouver acho... nume gad di allerletschte Sache wo passiert sind... 1. Vin et Fromage isch super gsi, fasch all vo de Schuel sind cho und am Schluss simmer inere Bar glandet wo für "les dames" Wodka, Whisky und Gin gratis gsi isch... Am nöchschte Tag han ich i de zwoite Stund en Privatlektion gha... (ned all wo chönd suffe chönd au ufstoh am nöchschte Tag- gäll Fabio?!) Tja und nachher isch eigentli alles rächt schnell gange, Abschied i de Schuel mit- hunderte vo Föteli, hei packe und scho gli ab in Flüger. Na ja... jetzt wo ich mich in Montréal so richtig igläbt han, isch es witer gange... wär eigentli fasch lieber no chli dete blibe... aber he, i zwe Wuche wirds andersch töne!!!

La neige

Vilich händ ihr's jo scho ghört... Sälte heds afangs Dezämber so vil Schnee in Montréal gha wie im Johr 2007... ich findes de Hammer. D'Strosse sind sit drü Täg ständig mit Schnee bedeckt- fasch kei Matsch übrigens!!! Uf de Trottoir heds "ei Persone Wägli" geh wo zwüsche min 50cm höche Schneesüüle dure- füehred. D'Schnee- maschine schiebed de ganzi Schnee uf d'Siite vo de Stross- det wo s'Auto's stöhnd. Die meischte Autos gsähnd also so us, als wäreds en Schneeberg. Ihr chönd oich jo vilich vorstelle, dass es um einiges Asträngender isch, dur d'Stadt z'laufe als normal, aber zum Glück händ di kanadische Archidäkte und Stadtplaner chli öpis i de Bire.
Z'wüsche de Metro- statione i de Innestadt heds kilometer- langi Tunnel wo vo de einte Metro- statione zu de andere führed, ich chan also foif Minute vo de Schuel entfernt "undertauche" und 20minute spöter gmüetlich im Shopping Center go lädele oder en Kafi go neh. Apropo Lädele, mer händ morn "fromage et vin" i de Schuel, ich han mer es Chleid und Schueh und alles müesse chaufe- wott jo ned negativ uffalle- ich schribe de, wie's gsi isch!

Heilige Stadt?!

Ihr dänkid jo vilich, dass ich do im ferne Kanada eifach mol chönni go d'Sou useloh??? Oder er möchid oich Sorge, dass mer do öpis chönnti passiere??? Denkste- die Stadt isch vo so vilne Heilige bsetzt, dass ich problemlos am foifi am Morge chan dur de früschi Schnee wandere... Das sind längscht ned alli "Saints" wo Montréal bewached- ich bin also guet ufghobe ;-)
Die Wuche hanis süsch eigentli rächt ruhig agange, han wiederagfange Volleyball z'spile und bi go Schlittschuehlaufe. Das sind übrigend d'Franzose vo oisere Schuel... also, die wos Franz am lerne sind. D'Engländer (so säg mer dene wo änglisch lerned, sind gad a nere Exkursion gsi.

Québec City

Bi gad vo Europa zruggcho... Québec City, isch ca 400Johr alt und bis jetzt wahrschinli di europäischti Stadt in Nordamerika wohn ich gseh han (sind vier, also ned übermässig vil...) han glücklicherwiis mit em Australier (mit dem bin ich au über d'Fridhöf uf de Mont Royal klättered)i sim Auto mit kali- fornische Nummere chönne mitfahre! Thanks Ed!!! Das isch er übrigens gad voll in Action...
Mer hed Québec würkli guet gfalle, hed vil Charm. Im Usgang hämmer vor allem Billard gspilt und Pfirsichschnapps (gids da bi ois?... Njami!!!) trunke. Leider isch das guete Städtli ned gad die Usgangsmeile schlechthin, die meischte Bars (mer händ immerhin vier usprobiert) sind ziemli leer gsi. Deför han ich umso meh gratis Pool-Billard Lektione gha! Im Bild obe gsänd er s'Hôtel du Parlament vo Québec. Wirde do ähne no zum Archidekturfan!

Halbzeit in Montréal

Di erschte zwe Wuche do in Montréal sind wie s'Bisiwätter umegange! S'chund mer überhaupt ned vor, ich säg scho zwe Wuche do! De Kino/ Bier- Tag hed übrigens als Kino/ Whiskey- Tag und imene Taxi gändet... Han doch tatsächlich di letscht Metro verpasst!!! Do isch no es Föteli vo de Lüt vo minere Schuel, leider ohni die vile Mexikaner, will die sind gad mol schnell uf New York!!! Es hed bi ois jetzt ca 15cm Schnee geh. Bi mer, also chli usserhalb vo de City isch er wunderschön und im Chueche... Matsch halt- uäk! Allne es schöns Wuchenänd!

Ändlich isch es sowiit

Ups, mues glaub gad chli ushole, de litscht Bitrag brichtet jo no vom Samschtig!!!
Am Sunntig bin ich nach usgibigem Früehstück (Brotherdöpfel, Omelette, Würschtli und Toast mit Butter...) mit em Ed (en Australier) uf de Mont Royal kragsled. Leider hämmer de offiziell Wäg ned gfunde und sind plötzli, so um di foifi z'mitzt imene riisige Friedhof glandet. Nach langem hi und her, dräckige Schueh, zwe Blotere und rächt vil glächter simmer dobe acho. Es hed sich also würkli glohnt... wow!
Geschter bini de mit em Javier (en Mexikaner, wo do chli schaffed und Änglisch lernt) go d'Oratoire St. Joseph (das isch die Chile wo's uf de rächte Siite vom Blog es Bild devo hed) go aluege. Schöns Gebäude aber süsch eigentli ned so spannend...
Und am Obig hanis de ändli fertig brocht, mini "familie d'accueil" um es Föteli z'bitte. Ihr gsänd do: (vo links nach rächts) de Jean-René, d'Dayoung, d'Miran und d'Francine. Hüt isch nix-Tag gsi und morn isch Kino/Bier-Tag, ich loh mers also lo guet go! Ach jo und ich han hüt zum erschte Mol kanadische Schnee gseh (no keis Föteli wert gsi)

Samichlausumzug

Geschter sind es paar vo oisere Schuel ad Parade de Père Nôel da isch eigentli echli meh wie Fasnacht als wie Wiehnacht, wie mer cha gseh... Es isch doch rächt kitschig gsi, und ich han am Änd vo de Parade mini Füess nüme gspührt!
Am Obig bin ich met em Jean-René und de Francine (mini Gaschteltere) zum Richard, de Brüeder vo minere Gaschtmuetter, also quasi min Gastonkel?! Nacher bini mit eim vo de Studänte wo bim Richard wohnt (us Frankriich) anes Reggeakonzert vom Nosliw gange... ich ha de natürli ned kännt, aber de reisisch so acht Stund zum Québec entdecke und was lauft im erste Club wo'd higosch? Dütsche Reggea. Uf jede Fall isch es cool gsi, will ich doch mol es bitz han chönne Franz rede im Usgang.

Übrigens... da isch vorallem für Lüt wo mit Wasser i de Hütte en routinierte Umgang händ, DO2 Team und mini Family, bi am Fritig heicho vom Uusgang, bi is Bad und ups, rägnets vo de Decki- ich also ufe mini Gaschteltere go wecke (ich liebe jo so Sitatuone...) "il pleut du plafond" da hed de mol churz en Ufregig ghe und am Mittwoch chund de de plombier verbi.

Le fin de semaine

Also, mini erschti Wuche i de Schuel isch duregschtande ... Mit Dictee und Présentation. Ich fühl mich gad chli wie i de DMS bim Herr Speich au wenn d'Hauptthemene gänderet händ... vo Alkohol, Alkohol, Alkohol zu Sex, Drugs and La Revolution de Québec...
Geschter simmer de mit de Schuel a de Büecher- mäss vo Montréal gsi (Salon du Livre). Und hüt bin ich de Parc d'Olympic go aluege- wow! Es isch so chalt gsi, das ich ned emol meh han chönne Kaugummi chätsche, will mis Gsicht igfrore gsi isch! Zum Ufwärme bin ich de in Biodôme gange und han mich i de tropische Zone chli ufgwärmt. Mini Durchbluetig isch also wider gfördered...
Ihr frogid oich was ich jetzt de mach? Ich go mit em Jesus eis go zieh... Em Jesus sin zwoite Name isch übrigens Maria- do passiert mer amu sicher nüd!

Vieux Montréal

Ändli hanis mol no gschafft, es "wohrzeiche" vo de Stadt zgseh... das wär also s'"Basilique de Notre Dame de Montréal". Händ hüt vo de Schuel us en Füehrig chönne mache dur d'Altstadt Montréal, da isch natürli de Teil vo de Stadt wo alli Touris sind und mini Schuel isch.

Apprendre le franglais

Hüt hani zum erschte mol Schuel gha. Ich bin NED i de "Bonjour-je m'appelle" Klass!!! Bi en Stund z'früeh i de Schuel gsi, will ichs Natel ned richtig umgschtellt han... Bravo Sibylle! Noch de Schuel bini no churz go shoppe und de bini zum Mont-Royal, de Üetliberg vo Montréal und han echli d'Ussicht gnosse. Ich ha mich also eigentli ned schlächt aklimatisiert... Nur mit de Chälti kämpf ich würkli, es isch megachalt und es isch irgendwie au im Huus und i de Schuel megachalt. De einzig Ort wo's warm isch isch i de Metro. Die isch aber so vollgstopft das mer gar kei Platz hetti zum de Mantel abzzieh...
Vo dene Eichhörnli heds do en Invasion, ha glaub i de letschte zwe Täg meh Eichörnli gseh wie i mim ganze vorhergehende Läbe...

Bi guet acho

Es isch gad drü am Morge und... ich glaub ich han chli en Jetlag...
Chli öppis vo de Reis:
Will die guet Frau vo de UBS ned ganz fähig gsi isch haett ich fasch 420 Franke verdient... keis Wunder, macht d’UBS so retour, oder?
Nachher simmer no am Kägi und em Dänu go hoi säge, die sind gad vo Singapur vo ihrere Eurasiereis zruggcho!Im Flugzueg hani zwe Plätz für mich elei gha... nei soooo schnell hani ned zuegnoh.
De Flug, isch ewig gange, au wenn die vo de Swiss guet chochid onds au suesch alles geh häend.
De bini vo somene richtige Québecois abgholt worde, wo mit mer irgendenden Mischig us italienisch und französisch gredet hed... ich befürchte das isch di lokali Sproch!
Mini Gaschteltere sind nett! De Jean René isch sicher en halbstund näb mer gschtande und hed mer gueti Tipps geh, wie ich chönnti uf sis Wireless zuegriffe… has trotzdem ersch jetzt gschafft und dFrancine zeiged mir hüt denn dSchuel. Uebrigens hed si geschter zum dessert ruebli torte gmacht...:-) Und als Hauptgang Lachs (was für en Überraschig) mit Riis.

Trennung

Oh... ha mis Auto verchauft... "sniff" (bi würkli chli sentimenal worde)! Usserdem bini sit hüt meh oder weniger legal wieder Murianer Iiwohner, sie händ mer sogar de lässigi Prospäkt geh, dass mer sich chan über Muri informiere...
das lohnt sich sicher no! ;-)

Gröflichäller 3.11.07

So, geschter isch also mis Fäschtli gsi- de Hammer, ich han's mega gnosse- vile dank a all wo cho sind und bsunders natürli ad Heinzelmännli (Evi, Dave und Nils)!!! Hoffentlich händ ihr au en gueti Ziit gha! Die Föteli (obe) sind so zwüsche achti am Obig und halbi zwölfi entschtande...
... die do eher chli spöter.

Festvorbereitungen

Ned vergässe, morn isch mis Abschiedsfäscht! Ich rächne mit oich allne! Die wichtigschte Vorbereitige sind hüt gloffe, morn müemer nor no de Gröflichäller echli z'rächtstutze... ich freu mi!

FERIEN

Das isch mis Team (gsi), di bede wo sich konträr für Schwarz entschide händ sind extra us em Frei cho (merci vil mol, da hed mi ganz bsunders gfreut!!!) De Abschied vom Ost E 3 isch sehr herzlich und mindischtens für mich es bitzli truurig gsi (nei, no kei Träne gflosse!).



Nach em Apéro sind d'Manuela (links), d'Daniela und ich no as Oktoberfäscht z'Züri, das isch bi ois bereits für langi und interessanti Obige bekannt gsi. Mer händ au es paar spezielli Begägnige gha...


Hüt hani vom halbi zähni am Morge bis jetzt (achti) züglet. D'Nicole und ich händ di ganz Hütte usenand gno. Ab jetzt wohn ich meh oder weniger offiziell wider a de Alte Buttwilerstross z'Muri!

Geschter isch KPZ-WG ässe gsi, isch cool gsi, wideremol es paar vo de Uusbildig z'gseh. Merci a all wo cho sind. Nacher bin ich, an es Freiämter Fäscht... au s'letschte für länger, verpasse jo sogar d'Fasnacht...


Tja und das isch mini Familie. Am Sunntig hämmer s'letscht mol vor minere Abreis zäme z'Nacht gässe.

Nachtwache, die letzte

Das isch also mini letschti Nachtschicht für es paar Mönet. Fasch scho chli schad. Wenn ned so vill z'tue isch (Holz alänge) isch es eigentli no ganz fridlich. Ich gnüsse also mini letschte Stunde uf em Ost E 3 i volle Züg...
P.S: büffle gad französischi Verbe... ich chume sicher id "bonjour_je-m'appelle-Klass"

Junger Bär auf Vancouver Island

Vom Bus aus zusammen mit seiner Mutter gesehen

Juhui, ich hans gschafft, min Blog stohd!